Говорот на усните

Усните можат многу да “кажат”за човекот: за неговиот карактер, расположението, годините па дури и за здравјето.

Усните се многу чувствителни благодарение на присуството на големиот број нервни завршетоци. Се смета дека идеален облик е кога усните не се премногу дебели ни премногу тенки, кога на горната усна убаво е изразен “аморовиот лак”, а во централниот дел имаат умерена задебеленост, природна чиста контура и умерено розева боја. Се смета дека тенките усни се знак за енергичен, но скриен и лош карактер. Луѓето со широки и дебели усни обично имаат мирен карактер. Мала уста и задебелени усни се својствени за префинети и сензуални луѓе, а цврсто збиени усни со спуштени агли надолу, се среќаваат кај песимистите.

Усните со годините се менуваат, ја губат природната боја и околу устата се појавуваат брчки. Може да се одложи појавата на овој за некои “тажен момент”. Но за тоа треба да се вложи многу труд. Секој ден усните треба да се масираат со маст за усни, а навечер после миење на забите, усните треба да се измасираат со измиена четка за заби. Тоа ја поттикнува циркулацијата во усните и ја одржува нивната природна свежина. Усните обично се “сушат”и ”пукаат”на ладно време бидејќи студот ја спречува нормалната циркулација во нив. Затоа најдобро е да употреби маст за усни кој создава заштитен слој кој не дозволува тие премногу да се изладат и помага да се сочува нивната влажност. Нивната состојба зависи и од други фактори: од сончевите зраци и ветерот, недостатокот на витамини во организмот, особено Витамин А, Б и Ц, но и од креми со лош квалитет.

 

Промените на усните во нивниот изглед ( боја, големина) се показател за нарушување на здравјето на човекот. Доколку на усните се појават пукнатини, аглите од усните станат зацрвенети, со возраста се задебели долната усна, тоа се сигурни показатели на хронична патологија на органите од желудочно-цревниот тракт. За вакви случаи, неопходно е да се побара мислење од лекар.

-авторски текст, не смее да се користи за комерцијални цели и/или реемитување-

 

Др. Кристина И. Стојаноска Алоска е родена во Охрид, 1984 година. Средно образование завршува во родниот крај, во гимназијата „Св. Климент Охридски“, природно- математичка насока, во 2003година. Дипломира на Стоматолошкиот факултет при Универзитетот „Св. Кирил и Методиј“ во Скопје, во 2008 година. Со работна лиценца за доктор по стоматологија се стекнува по положување на државниот испит во 2009 година. Во соработка со ОО Црвен крст - Охрид издава две брошури поврзани со оралното здравје. По повод Неделата на забоздравствена заштита, во 2014 ја издава Брошурата „ГРИЖА ЗА ЗАБИТЕ“ наменета за најмладите во која се опишани правилата за здрави заби што треба секое дете да ги знае. Следната, 2015 година, за истата цел ја издава брошурата „НАСМЕВКА БЕЗ КАРИЕС“, на малку повисоко ниво, наменета за сите родители и деца, во која се опишани сите нешта поврзани со кариесот и тоа како да се спречи. Во 2017 година издавачката куќа ЕДУКА МАК ја издава нејзината книга со 10 раскази на тема орално здравје, напишани како поезија во проза, со наслов „НАСМЕВКА ЗА ПЕТКА“. Работна пракса како доктор на стоматологија извршува во Стоматолошката ординација "ЕТАДЕНТ" во Охрид, чиј сопственик е од 2019 година. Доктори.мк е портал кој на популацијата и овозможува да согледа многу проблематики од областа на здравството и да научи многу совети и факти за животот , исхраната и здравјето. Мапата претставува одличен и најбрз начин преку кој може да се лоцира доктор или некоја медицинска установа. Особена чест и огромно задоволство ми претставува што сум дел од тимот на Доктори.мк и искрено се надевам дека преку моите статии читателите на Доктори.мк ќе научат многу проблеми од областа на стоматологијата. Доктори.мк според мене е par excellence портал од областа на здравството во Македонија. Големо БРАВО за основачите!!!