Херпес на усните – чест проблем за време на летниот одмор

0

Летувањето не секогаш знае да понуди целосно задоволство. Еден од проблемите кој се јавува после добар провод на плажа и уживање под сонце, нема многу да Ве израдува.

Ви се појави херпес на усните? Повторно?

 

Дознајте малку повеќе што е всушност херпесот, кој го предизвикува, кои се симптомите, дали има начин превентивно да делувате, и најважно, што да направите ако Ви се појави херпес на усните…

Причини, патогенеза и пренесување

Причинител на херпес на усните е херпес симлекс вирусот тип 1, кој спаѓа во групата на ДНК- вируси, Herpes viridae. Инфекцијата со херпес вирусот се јавува секаде во светот, но преваленцата е различна во различни земји. Единствен резервоар на вирусот е човекот. Вирусот се пренесува преку директен контакт, бакнување и користење на заеднички прибор за храна со инфицираната особа. Примарната инфекција обично се случува во детството, а носителството на вирусот останува доживотно. Вирусот се искачува преку сензитивни нерви до дорзалните ганглиони (ганглион на трогранковиот нерв) и таму останува во латентна состојба. При реактивација, вирусот се движи до усните и предизвикува херпесни лезии. Реактивација на вирусот се случува при долготраен стрес, долго изложување на сонце, недоволна и неправилна исхрана, недоволен внес на витамини, ексцесивно консумирање на алкохол и при состојби на намален имунитет, како што се настинките и респираторните инфекции.

Симптоми

После 4-6 дена од контактот со вирусот, реплицираните вируси предизвикуваат клеточна смрт и воспаление, и се појавуваат меурчиња (везикули) на зацрвенета (еритематозна) кожа или слузокожа. Симптомите се јавуваат неочекувано, со чувство на дискомфор и чешање. Меурчињата може да печат и да се осетливи на допир. Локалните лимфни јазли може да се зголемени, а понекогаш се јавува главоболка, треска, мускулна болка и слабост. Кај посериозни случаи, херпесната лезија прекрива поголема површина. После неколку дена, меурчињата прскаат, од нив истекува течност, а потоа може да се формира лузна која е обложена со кора. Симптомите на херпес инфецијата на усните обично поминуваат за 1-3 недели. Кај полесни случаи, симптомите се повлекуваат за 3-5 дена. Инфекциите кај имуносупримирани пациенти имаат потежок тек и полош исход. Херпесот на усните може да се искомплицира и да настане воспаление на мозокот и мозочните обвивки (менингоенцефалитис).

Превенција

Избегнувајте директен контакт со лицата кои имаат активирана инфекција: не се бакнувајте и не користете заеднички прибор за јадење и други предмети.

Ако за време на летните одмори често Ви се појавува херпес на усните, избегнувајте долготрајно сончање и пливање. Обратете поголемо внимание на хигиената, хранете се здраво, намалете го стресот и користете заштитни средства за кожа.

Вакцина против херпес вирусот не е пронајдена, но во тек се интензивни испитувања.

Терапија

Лек на избор кој дејствува само на херпес вирусите е ацикловирот. Се применува локално (во форма на маст), орално или парентерално. Многу е важно ацикловирот да се употреби веднаш после појавувањето на првите симптоми, затоа што лекот спречува само ширење на вирусот, а не го убива.

Постапки во домашни услови

Некои од следниве постапки може да придонесат во ублажувањето на симптомите:

  • По појавата на херпесната лезија, нанесете паста за заби која содржи цинк или алкохол
  • На незрелите меурчиња нанесете мраз
  • Ставете облога со екстракт од лук
  • Лузните премачкајте ги со алое вера.

Уживајте во летниот одмор 🙂

 

Д-р Филип Конески
Филип Конески е роден на 7.1.1991 год. во Белград. Основно училиште завршил во Прилеп, а средно медицинско училиште во Битола, насока забен техничар. Во 2009 год. се запишува на Стоматолошкиот факултет при УКИМ во Скопје. Дипломира во 2014 год. со среден успех 9,62 и се стекнува со титулата д-р по стоматологија. На предлог на Деканот на Стоматолошкиот факултет и поддржан и препорачан од бројни професори и претставници од релевантни стоматолошки здруженија во Македонија, во 2013 год. ја добива престижната Награда на Град Скопје „13 Ноември“ за континуирани успешни достигнувања во наставните и воннаставните активности, кои се од особено значење за афирмацијата на градот и Р. Македонија. На 19. Меѓународен научен конгрес на студентите по стоматологија во Охрид 2012 год. освојува втора награда за усна презентација. На 21. и 22. Меѓународен научен конгрес на студентите по стоматологија во Охрид во 2013 и 2014 год. ги освојува првите награди за најдобри усни презентации. Организатор е на работилници во рамките на студентските конгреси. Секоја година е дел од акцијата на Македонското стоматолошко друштво за одбележување на Светскиот ден на оралното здравје, преку одржување предавања и едукација на учениците во основните училишта за важноста на оралното здравје и начинот на неговото зачувување и унапредување.Дел е и на бројни хуманитарни акции за помош на социјално загрозени семејства и деца со пречки во развојот. Дел е од организациониот тим на бројните стручни настани и симпозиуми на Македонското стоматолошко друштво и специјалистичките здруженија кои се во склоп на друштвото. Свој придонес дава и во организирањето на 18. Конгрес на Балканското стоматолошко здружение во 2013 год. Од 2012 год. Филип Конески е амбасадор на Р. Македонија во меѓународното списание International Dental Journal of Students’ Research (ISSN 2278-3784). Во 2011 год. станува дел од тимот на македонскиот веб портал за медицина и здравје доктори.мк, на кој објавува авторски текстови од областа на стоматологијата. Во 2012 год. е добитник на Признание за особен придонес во развојот на здравствените веб содржини и подобрување на здравствената едукација во Р. Македонија. Од особен интерес на Филип е максилофацијалната хирургија и денталната патологија, во чии полиња работи на неколку проекти и истражувања со реномирани професори од тие области. Контактирајте го Филип на koneski_filip@hotmail.com -Здравствената едукација на населението и пациентите има непроценлива важност за нивното здравје, особено за превенцијата, на која треба да се обрнува поголемо внимание. Доктори.мк е место каде се интегрира и на достапен начин се презентира знаењето на професионалци од многу медицински области, со што се постигнува целта за подигнување на свеста и здравствената култура на секој поединец. Доктори.мк е наш бренд со кој треба да се гордееме. Да се биде дел од тимот автори и соработници претставува голема чест и задоволство.