Митови и вистини за оралното здравје - прв дел

доктор по стоматологија

Се чини како да е се познато кога се зборува за правила и препораки како ефикасно да се грижиме за оралното здравје. Меѓутоа, од ден на ден се појавуваат нови верзии на старите добри принципи на оралната хигиена. Како резултат на тоа, многу луѓе и понатаму остануваат збунети. Колку често треба да се мијат забите? Дали избелувањето на забите е штетно? Се отвораат прашања и во врска со многу други стоматолошки постапки... Во продолжение прочитајте некои од најпопуларните митови во врска со оралното здравје!


 

 
МИТ: Миењето на забите неколку пати во текот на денот е штетно за забите.

ВИСТИНА:  Делумно ова е точно. Обично се смета дека доволно е забите да се мијат 2 пати дневно, но доколку имате прилика да ги миете забите често (на пр. После секој оброк) задолжително употребувајте мека четка за заби.

 

МИТ:  Скапите пасти за заби се секогаш поубави од ефтините.

ВИСТИНА:  Тоа не е секогаш точно. Некои умерено скапи пасти за заби можат да бидат многу ефикасни. Во зависност од состојбата на Вашите заби, побарајте совет од стоматолог каква паста најмногу Ви одговара.

 

МИТ:  Џвакањето гуми за џвакање без шеќер со ксилитол после оброк може да го замени миењето на забите и има ист ефект.

ВИСТИНА: Тоа не е точно, но доколку немате можност да ги измиете забите после секој оброк, можете да користите гуми за џвакање без шеќер за чистење на забите и освежување на здивот. Немојте да џвакате гума за џвакање повеќе од 10 минути.

МИТ: Не треба да се мијат забите доколку непцата крварат.

ВИСТИНА: Крварењето на непцата е знак дека треба да посетите стоматолог. Меѓутоа, доколку не сте во можност веднаш да го направите тоа, можете да ги миете забите со мека или екстра мека четка за заби.

МИТ: Поставувањето на таблети аспирин покрај забот кој боли може да ја олесни болката.

ВИСТИНА: Аспиринот на овој начин не делува на олеснување на болката. Освен тоа, може да ги оштети меките ткива во Вашата уста. Подобро е да се користат природни аналгетици на пример некои растителни масла.

МИТ: Нема потреба да одите на стоматолог доколку немате никаков проблем со забите.

ВИСТИНА: Подобро е да се спречи и да се лечи во најраната фаза. Не заборавајте на правилото посета на стоматолог на секои 6 месеци.

МИТ: Ако глеѓта е бела, забот може да се смета за здрав.

ВИСТИНА: Тоа апсолутно не е точно. Забот може да изгледа здрав и бел, а во исто време може да има шуплини, проблеми со коренот или други абнормалности кои бараат лечење на забот.

МИТ: Подобро е да се лекува кариозниот заб отколку да се одлучите за негова екстракција.

ВИСТИНА:  Пред да ја донесете одлуката дали забот ќе го лекувате или не, мора да се посоветувате со стоматолог или да побарате мислење од повеќе стоматолози. Понекогаш дури и премногу деструиран заб може да биде “обновен”, а во исто време постои ситуација кога дури здрав заб може да биде екстрахиран. 


 

МИТ: Подобро е да се изврши екстракција на умниците бидејќи тие обично предизвикуваат проблеми.

ВИСТИНА: Немојте да ги екстрахирате умниците пред тие да почнат да Ви создаваат проблеми.

 

д-р Кристина И. Стојаноска Алоска

 ПЗУ "Д-р Каланоска" -  Охрид

-авторски текст, не смее да се користи за комерцијални цели и/или реемитување-

www.doktori.mk, 24.04.2013

Последна вест

Најчитани статии - стоматологија