Пубертет кај машките деца- Се што треба да знаат децата и родителите

доктор на медицина

Пубертетот кај машките деца се состои од две до четири години интензивен раст и развој на детето. Во овој период детето расте и се развива како физички така и психички при што станува возрасен маж. Во текстот што следи ќе се обидам да дадам важни информации во врска со пубертетот кај машките деца и се она што децата и родителите треба да ги знаат ...

Кога започнива пубертетот?

И кај машките и кај девојчињата пубертетот не започнува и завршува во прецизно време. Почетокот на пубертетот кај мажите е некаде по 12-тата година и може да трае во период од 2 до 4 години, поретко и нешто повеќе. Пубертетот се завршува некаде околу 16-тата година, но може и нешто подоцна.

Кога можеме да зборуваме за преран или доцен пубертет?

  • За преран пубертет обично зборуваме кога пубертетот ќе се јави пред навршени 10 години. Појавата на знаци на пубертет во овој период бара консултација со лекар, но не секогаш ова е причина за паника. Во некои семејства прераниот пубертет е генетски, почнува многу рано но завршува нормално како и кај другите деца. Преран пубертет може да се јави и поради други состојби на телото кои бараат лекување. Затоа прераниот пубертет бара преглед од лекар.

  • За доцен пубертет, зборуваме кога детето не развива знаци на пубертет по наполнување на 16 години. Причини за ова можат да бидат наследни како и при раниот пубертет, во таков случај пубртетот се јавува подоцна и се завршува без проблеми. Но, поретко може да се јави како резултат на органски оштетувања најчесто на хипоталамусот па поради ова ако детето не развие знаци на пубертет до 16 година потребен е преглед од лекар.

При раниот и доцниот пубертет децата често имаат психолошки трауми поради предвремената промена на неговото тело или доцнењето на знаците на пубертетот во однос на неговите врсници. Затоа на детето треба да му се објасни дека не е ништо не нормално и нема потреба да чувствува срам поради тоа,  понекогаш е добро истото и да разговара со психолог.

Редослед на развој

Обично луѓето забележуваат дека детето е во пубертет кога ќе го забележат неговиот нагол раст или промена на гласот, останатите промени обично се познати само на детето или на родителите кои го следат со внимание. Развојот обично има редослед што не мора да е стрикно поврзан со овој кој што ќе го презентираме, но го презентирам по ред кој обично се јавува со цел децата да разберат дека промените кои се случуваат на телото се физиолошки и не треба да го загрижуваат.

Најпрвин детето забележува промени во тестисите, тие се зголемуваат и скротумот исто така се зголемува заедно со нив. Влакна започнуваат да се јавуваат пред да започне да се менува пенисот, најпрво влакна се јавуваат околу коренот на пенисот иако тој сеуште има детски изглед. Веднаш по појавата на влакната околу коренот на пенисот и пенисот започнува да расте во дебелина и должина, а кратко потоа се забележува и раст и развој на целото тело со забрзано растење на детето во висина. Во следните години растот продолжува но со многу помал интензитет. Ратот престанува некаде во период помеѓу 18 и 20 години, некогаш трае и повеќе ако детето влегло покасно во пубертет. Ерекциите и ејакулациите започнуваат некаде околу 14-15 година или веднаш по започнување на растот и развојот на пенисот. Веднаш по започнување на наглиот раст и развој започнува да растат и влакна под пазувите и развојот на брадата на лицето, која некогаш може да се јави и порано а некогаш и доста подоцна во животот, во зависност од дете до дете има големи варијации во врска со појавувањето на брадата и нејзината изразеност, дури и кога таа многу малку се појавува не се смета за патолошки процес, ако останатите знаци на пубертет се нормални. Појавата на влакнетост е најпрво околу пенисот, па под пазувите а потоа се јавува и на лицето.


Растот на телото кај повеќето деца е најизразено околу 13-14 години, но често пикот на раст знае да биде  и по 14 -тата година и тоа се смета за нормално.  Во пубертетот децата обично растат нешто повеќе од 10 центиметри, но и многу повеќе во зависост од идивидуата, главата прва го достигнува максимумот, а потоа и останатите делови на телото.

Срцето, белите дробови и абдоминалните органи исто така растат во периодот на пубертето, притисокот се зголемува, срцевата акција се забавува а белодробниот капацитет расте. Единствен орган кој во пубертетот се смалува и полека инволуираа е тимусот.


Родителите треба да обрнат многу внимание на децата во периодот на пубертетот, Целото тело во овој период е под зголемен ризик, затоа физичката активност, здравата храна и редукцијата на стресот на детото треба да бидат имепратив за секој родител. Родителот треба да ги следи знаците на пубертетот и развојот на телото на детето, но мора да се нагласи дека ова треба да се прави особено внимателно бидејќи детето како физички, во овој период се развива и психички, па неговата приватност мора да се пичитува.

Хигиена и типични промени

Во овој период кај детето започнува интензивно лачење на пот, што го прави детето да чувстува многу по непријатен мирис од тоа што е навикнато, затоа детето треба што почесто да се тушира за да се зачува хигиената. Ако мирисот е интензивно непријатен потребно е да се користи и антибактериски сапун или да се бара совет од лекар. Појавата на акни и  гинекомастија можат да бидат составен дел на пубертетот ако се изразени треба да се побара лекарска помош, ако не истите спонтано ќе се повлечат по бувертетот.

Психички промени

Мажите во периодот на пубертетот можат да бидат интензивно раздразливи да се одалечат малку од родителите и да се навредуваат лесно. Оваа лутина и раздразливост обично е нормална и ќе се стабилизира по завршување на пубертетот, детето не треба да се става под притисок, туку само да се набљудува. Мора да се нагласи дека опасноста од склоност кон дрога пушење и алкохол се најголеми во овој период, па затоа е потребно да се биде внимателен. Но тука улогата на родител е ограничена бидејќи детето е под поголемо влијание на друштвото и околината. 

Пубертетот и сексот

Сексот е навистина сериозна тема особено во пубертетот на мажите. Деликатноста на темата уште повеќе ја усложнува ситуацијата. Затоа се смета дека во врска со сексуалното образование е подобро децата да се учат во училиште или преку интерактивни предавања, бидејќи машкото дете ретко сака да разговара за тоа со родителите. Сепак таткото е одговорен да се обиде да му ја објасни сериозноста на сексот како и начинот на адекватна заштита, а исто така и сериозните последици кои можат да следат доколку пристапува без размислување.

Дознајте повеќе за авторот Роберт Николовски

-авторски текст, не смее да се користи за комерцијални цели и/или реемитување-

www.doktori.mk, 08.03.2015

Последна вест

Најчитани статии - медицина