Што смееме да јадеме и колку течности треба да внесуваме пред вежбањето?

професор по физичко и здравствено образование

Доколку се одлучите да почнете со вежбање, не смеете да заборавите дека за добри резултати важна улога има и добрата исхрана.

Во текот на тренингот  треба да се зема умерено количество  вода, затоа што во текот на вежбањето телото  со самото потење губи одредено количество вода.

Целта на внесената храна пред тренинг  е да обезбеди потребна енергија и обично е  најдобро  три часа пред вежбање да се конзумира храна богата со јаглени хидрати и протени. Во таква храна спаѓаат интегралните тестенини, интегралниот ориз, црвениот компир и пилешкото бело месо.

Многу важно е да се напомене дека не треба да се јаде непосредно пред вежбањето. Доколку сме јаделе месо, најдобро е да почекаме два часа, па после тоа да почнеме со вежбање. Овошје или овошен јогурт пак, можеме да конзумираме пола час или еден час пред вежбањето.

После квалитетно вежбање, мускулите се преуморни, а нивото на шеќерот во крвта драстично опаѓа, и тогаш почнува разградување на мускулите. Единствен начин да се прекине тој негативен процес, и одново да почне нормалната активност на мускулите е преку внесување на потребните прехрамбени продукти.


 

Вода

Водата е најважна состојка за здрав живот. Нашето тело содржи 65% вода. Со неконзумирање вода можеме да изгубиме до 20% енергија и снага која ни е потребна за тренинг. Како што кажавме и погоре, со самото потење телото губи одредено количество вода. Препорачливо е да се пие  2-4 литри вода дневно, а тука освен водата спаѓаат разни сокови и други напитоци. Не е добро многу пиење вода пред тренинг затоа што тоа го забрзува отфрлувањето на  минерали од организмот. Во текот на тренингот треба да се зема умерено количество на вода поради што кога се вежба телото дехидрира.

Протеини и јаглехидрати 

Каде ги има протеините?

  • Јајца
  • пилешко месо
  • телешко месо 
  • риба
  • млеко
  • грав
  • соја 
  • сирење и др.

Каде ги има јаглените хидрати?

  • житарки
  • интегрален ориз
  • овошје
  • зеленчук
  • јаткасти плодови (лешници, ореви, бадеми, кикиритки и др.)

 

Комбинација од протеини и јаглехидрати

Организмот далеку побрзо може да функционира  кога ќе го урамнотежиме внесувањето на јаглените хидрати и протеините. Протеините освен  што се неопходни  за изградувањето на здрави мускули и одржувањето на јак имунолошки систем исто така го стабилизираат  и нивото на инсулин.  Инсулинот  го одржува рамномерно енергетското ниво во деновите на вежбање.

 

Енергетски пијалаци

Факт е дека освен водата, голем број луѓе користат енергетски пијалоци за да ја подигнат својата  енергија потребна за вежбање. Овие пијалоци влијаат на метаболизмот, но ваквиот избор е меч со две острици, затоа што после наглото зголемување на  енергијата следува и брзо опаѓање на истата.

Треба да се разликуваат енергетските пијалоци полни со шеќер, од енергетските пијалоци полни со витамини, кои често немаат шеќер  туку вештачки витамини. Постојат и така наречени освежителни пијлоци кои немаат ни витамини ни шеќер поради што стручњаците не ги препорачуваат. Најквалитетните пијалоци кои  спортистите ги користат се изотониците, тоа се пијалоци кои имаат сконцентрирна сол. На пример: потта содржи сол, телото со вежбањето се поти и губи сол , а со овие пијалоци се надополнуваат изгубените количини.

Дознјате повеќе за Катерина И. Стојаноска, професор по физичко и здравствено образование

-авторски текст, не смее да се користи за комерцијални цели и/или реемитување-

www.doktori.mk, 05.07.2014

Последна вест

Најчитани статии - вежби