Најчести грешки при миење заби

Редовното и правилното миење на забите е есенцијално во борбата против кариесот и заболувањата на потпорниот апарат на забот. Миењето заби е многу едноставна секојдневна постапка, но многумина несвесно ја изведуваат погрешно.

За да имате убава насмевка, здрави заби и свеж здив предуслов е да ги избегнувате следниве грешки.

Стоматолозите препорачуваат четкање на забите околу 3 минути, но на повеќето од нас честопати ни се случило да брзаме некаде и да ги исчеткаме забите многу бргу, речиси помалку од 30 секунди. За вашата здрава насмевка одвоите доволно време за четкање на забите или користете електрична четка со тајмер за да бидете сигурни дека посветувате доволно време на вашите заби.

Многу често, бргу четкајќи ги забите, тоа го правиме премногу силно, мислејќи дека така темелно ќе ги исчеткаме. Но, тоа е сосема погрешно, бидејќи така само го оштетуваме емајлот на забите, кој е заштитен слој. Четкањето на забите треба да биде со благи кружни движења, за да се остранат меките наслаги.

Луѓето многу често ги четкаат своите заби со хоризонтални движења што е сосема погрешно. Кога ги миете забите поставете ја четката под агол од 45 степени во однос со линијата каде се спојуваат забите и непцата. Правете нежни вертикални кружни движења, кон гризните површини на забите, задржувајќи се околу десетина секунди на секој заб.

Четкањето на забите веднаш по вашиот оброк е погрешно бидејќи одредени продукти содржат киселини кои влијаат на емајлот на забот. Затоа стоматолозите препорачуваат четкање на забите половина час по вашиот оброк.

Многумина често испирањето на устата после четкањето на забите го прават површно, а тоа е многу важно бидејќи со четкањето на забите се остранува плакот и бактериите присутни во него, па е потребно нивно темелно испирање. Темелно испирање е многу важно и за вашата четка, бидејќи ако тоа не сте го направиле, со наредното миење ги враќате бактериите повторно во вашата уста.

Четкањето на јазикот е многу важно бидејќи во него се присутни исто така голем број бактерии.

Најчесто најмногу ги четкаме забите кои најпрво започнуваме да ги миеме, додека на останатите им посветуваме помалку време. Според стоматолозите најзанемарени се предните заби и внатрешните страни на забите. Тие препорачуваат подеднакво четкање на сите заби и забни површини.

-aвторски текст, не смее да се користи за комерцијални цели и/или реемитување-

дознајте повеќе за авторот >>>