Менопауза - пресвртна точка во животот на жената

Иако многу млади девојки на менопаузата гледаат како на далечен период од нивниот живот, не треба да се заборави дека животот поминува неверојатно брзо. Застанете и погледнете околу себе. Можеби во следниот текст ќе го најдете објаснувањето за понекогаш нелогичното однесување на нашите мајки, тетки, па дури и баби.

Менопаузата е пресвртна точка. Не е болест, но може да има големо влијание врз општата благосостојба на жената. Иако менопаузата може да донесе физички промени како жешки бранови, ноќно потење и други симптоми, исто така може да биде и почеток на нова и благородна фаза во животот на жената и златна можност за борба против главните здравствени ризици како срцева болест и остеопороза.

Возраста е главна причина за менопауза. Тоа е крајот на женскиот репродуктивен период, предизвикан од постепеното намалување на функцијата на овариумите. Одредени хируршки процедури и медицински третмани може да предизвикаат јатрогена менопауза. Тука се вбројуваат хируршкото отстранување на овариумите (билатерална оофоректомија), хемо- и радиотерапија. Но, само хистеректомија (хируршко отстранување на утерусот) без отстранување на овариумите не води до менопауза иако повеќе нема да се јавуваат менструални крварења.

Според Националниот институт за стареење на САД, во просек жените на 51 година се во природна менопауза. Но, менопаузата може да започне порано или подоцна. Кај мал број жени менопаузата може да започне и на 40 години, а кај многу мал процент во подоцнежна возраст на 60 години. Жените-пушачи поминуваат низ менопаузата неколку години порано од непушачите. Не постои докажан начин на кој може да се предвиди возраста на која настанува менопаузата.

Менопаузата може да се потврди само кога жената во период од 12 последователни месеци нема менструални циклуси, во отсуство на други очигледни причини за аменореа.

Природната менопауза започнува постепено. Овариумите не престануваат наеднаш да функционираат; тие постепено ја намалуваат брзината на нивното функционирање. Преодот кон менопаузата се нарекува перименопауза. Менопаузата е пресвртница - тоа е денот што означува 12 последователни месеци од последниот менструален циклус на жената. За време на перименопаузата возможно е жената да остане бремена - репродуктивниот период на жената се прекршува и иако нејзините менструални циклуси стануваат непредвидливи, овариумите се уште функционираат и може да овулираат, но не мора да значи дека тоа се случува секој месец.

Менопаузата не е настан кој има универзални симптоми кај сите жени (not one-size-fits-all). Некои жени влегуваат во менопаузата без никакви или со минимални тегоби; други искусуваат тешки симптоми кои драстично ги отежнуваат нивните животи. Но, кога менопаузата започнува ненадејно, како резултат на хируршка интервенција, хемо- или радиотерапија, тешко е организмот да се приспособи на новите промени. Еве некои од симптомите кои жените може да ги искусат иако интензитетот на тие симптоми може да варира.

Како што се наближува менопаузата, менструалните циклуси најверојатно ќе се променат. Но, тие промени варираат од жена до жена - циклусите може да станат пократки или подолги, со пообемно или пооскудно крварење. Таквите промени се нормални, но Националниот институт за стареење препорачува да се посети доктор доколку периодот од едно до друго менструално крварење е многу краток, ако имате обемно крварење или истото трае подолго од една недела.

Жешките бранови, т.н. валунзи, се јавуваат кај 75-85% од жените. Ненадејно, транзитно чувство на топлина или жештина која се шири низ телото и кое доведува до црвенило, особено на лицето и горниот дел од телото. Валунзите се јавуваат поради намаленото ниво на естрогени во организмот. Ноќната верзија на жешките бранови е ноќното препотување, познато и како “nocturnal hyperhydrosis". Покрај несоницата, тие може да доведат и до вознемиреност и напади на паника. Стресот е главниот тригер фактор на жешките бранови во менопаузата.

За олеснување на симптомите обидете се со следните трикови:

• • Користете вентилатор во спалната соба;
• • Одбегнувајте подебели прекривки за спиење;
• • Одберете лесни, памучни и меки материјали за спиење;
• • Чувајте намокрена крпа во близина за да се оладите брзо ако се разбудите со бранови на топлина и потење.

Намаленото ниво на естроген во телото доведува до вагинална сувост и атрофија на вагиналната слузница, што може да го направи сексуалниот однос непријатен и болен. Покрај тоа може да се јави лесна иритација на вагината, зачестено чешање и склоност кон инфекции. Хормонскиот дисбаланс доведува до плима и осека на либидото, но и многу фактори покрај менопаузата го афектираат “сексуалниот нагон” - стрес, лекови, депресија, несоница, проблеми во врската… Доколку се јават вакви проблеми -разговарајте со Вашиот доктор. Не дозволувате одговорот на прашањето за Вашиот сексуален живот да биде “така-така”. Но, запомнете, сексуално преносливите болести не завршуваат со менопаузата; се уште треба да се мисли на сигурен секс.

• • Епизоди на срцебиење (палпитации) – вториот најчест знак во перименопаузалниот период;
• • Епизоди на депресија – една од пет жени во одреден период од животот ќе страда од клиничка депресија;
• • Анксиозност, иритабилност, напади на паника и страв;
• • Ненадејни промени во расположението (up and down);
• • Болки во зглобовите, мускулите и тетивите кои не се резултат на трауматска повреда или физичка активност;
• • Хроничен замор;
• • Паѓање и истенчување на косата и зголемување на влакнетоста на лицето (естрогенот е неопходен за стимулирање на фоликулите на влакната);
• • Чувство на подуеност - задршка на течности и подуен стомак (метеоризам и вишок на гасови);

• • Нарушена концентранција, дезориентација и ментална конфузност;
• • Заборавање (проблеми со меморијата);
• • Вртоглавица, лесни главоболки, епизоди на нарушена рамнотежа;
• • Зголемување на телесната тежина (стареење, забавен метаболизам, ниско ниво на естрогени);
• • Стрес инконтиненција (подмочнување) по кашлање, кивање, смеење; и ургентна инконтиненција;
• • Болки во дојките;
• • Чувство на печење во устата, промени во осетот за вкус, лош здив.

Во наредната статија ќе стане збор за справувањето со менопаузалните симптоми...

Останати статии од рубриката>>>

-авторски текст, не смее да се користи зa комерцијални цели и/или реемитување-